ភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន លោក ប៉េង ពោធិ៍នា បានបញ្ជាក់ឱ្យដឹងថា គម្រោងព្រែកជីកហ្វូណនតេជោ គ្រោងនឹងបើកការដ្ឋានសាងសង់នៅអំឡុងត្រីមាសទី៤ ឆ្នាំ២០២៤ ខាងមុខនេះ។

តាមរយៈផេកហ្វេសប៊ុករបស់ក្រសួងសាធារណការ និងដឹកជញ្ជូន លោក ប៉េង ពោធិ៍នា បានប្រាប់ឱ្យដឹងដូច្នេះថា៖ «យើងនឹងមាន គម្រោងព្រែកជីកហ្វូណនតេជោ ជាគម្រោងព្រែកជីកជាប្រវត្តិសាស្ត្រនៅកម្ពុជា ដែលគ្រោងរៀបចំពិធីបើកការដ្ឋានសាងសង់ក្នុងអំឡុងត្រីមាសទី៤ ឆ្នាំ២០២៤ ខាងមុខនេះ»។

គម្រោងផ្លូវនាវាចរណ៍ នេះគឺជាគម្រោងប្រវត្តិសាស្ត្រលើកទី១ ក្នុងវិស័យដឹកជញ្ជូនផ្លូវទឹករបស់កម្ពុជា ដោយតភ្ជាប់រវាហប្រព័ន្ធទន្លេមេគង្គ និងផ្លូវសមុទ្រ។

ផ្លូវទឹកនេះមានប្រវែង ១៨០គីឡូម៉ែត្រចាប់ពីព្រែកតាកែវនៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចចូលតាមព្រែកតាហ៊ីងនៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន៤ គឺខេត្តកណ្តាល តាកែវ កំពត និងកែប។

គម្រោងនេះគ្រោងចំណាយទុនវិនិយោគ ១ ៧០០លានដុល្លារ និងប្រើពេលសាងសង់ចំនួន ៤ឆ្នាំ ដែលជាគម្រោងវិនិយោគដោយក្រុមហ៊ុនចិនដោយអនុវត្តតាម BOT។ តាមរយៈគម្រោងនេះបានក្លាយជាក្តីកង្វល់របស់ប្រទេសវៀតណាម តែរាជរដ្ឋាភិបាលកម្ពុជាថា គម្រោងនេះមិនប៉ះពាល់ដល់លំហូរទឹក និងបរិស្ថានដល់ប្រទេសវៀតណាម និងប្រទេសជិតខាងឡើយ៕